राज्यातील बहुप्रतीक्षित स्थानिक स्वराज्य संस्थांच्या निवडणुकीचे बिगुल वाजले आहे. राज्य निवडणूक आयुक्त दिनेश वाघमारे यांनी १२ जिल्हा परिषदा आणि त्यांतर्गत येणाऱ्या १२५ पंचायत समित्यांचा निवडणूक कार्यक्रम जाहीर केला आहे. यानुसार ५ फेब्रुवारी २०२६ रोजी मतदान होणार असून, ७ फेब्रुवारीला मतमोजणी पार पडेल. या घोषणेसोबतच संबंधित जिल्ह्यांत आचारसंहिता लागू झाली आहे.
निवडणुकीचा तपशील आणि जागा
या निवडणुकीत एकूण ७३१ जिल्हा परिषद जागा आणि १,४६२ पंचायत समिती जागांसाठी मतदान होणार आहे. यामध्ये महिलांसाठी ५०% आरक्षण असून जिल्हा परिषदेत ३६९ आणि पंचायत समितीत ७३१ जागा महिलांसाठी राखीव आहेत.
निवडणूक होणारे जिल्हे:
रायगड, रत्नागिरी, सिंधुदुर्ग, पुणे, सातारा, सांगली, सोलापूर, कोल्हापूर, छत्रपती संभाजीनगर, परभणी, धाराशिव आणि लातूर.
महत्त्वाच्या तारखा (निवडणूक वेळापत्रक):
अधिसूचना प्रसिद्ध होणे: १६ जानेवारी २०२६
नामनिर्देशनपत्र भरणे (ऑफलाईन): १६ ते २१ जानेवारी २०२६
अर्जांची छाननी: २२ जानेवारी २०२६
उमेदवारी मागे घेण्याची मुदत: २७ जानेवारी २०२६
मतदान: ५ फेब्रुवारी २०२६ (सकाळी ७.३० ते संध्याकाळी ५.३०)
मतमोजणी: ७ फेब्रुवारी २०२६
उमेदवारांसाठी महत्त्वाचे: अर्ज आता 'ऑफलाईन'
विविध राजकीय पक्षांची मागणी लक्षात घेता, राज्य निवडणूक आयोगाने यावेळी नामनिर्देशनपत्रे (Form) आणि शपथपत्रे स्वीकारण्यासाठी पारंपारिक 'ऑफलाईन' पद्धतीचा अवलंब करण्याचा निर्णय घेतला आहे. राखीव जागेवर निवडणूक लढवणाऱ्या उमेदवारांना जात वैधता प्रमाणपत्र किंवा ते सादर केल्याचा पुरावा जोडणे अनिवार्य असेल.
खर्च मर्यादा निश्चित
आयोगाने जिल्हा परिषद विभागांच्या संख्येनुसार उमेदवारांसाठी खर्च मर्यादा ठरवून दिली आहे. ७१ ते ७५ विभाग असलेल्या जिल्हा परिषदेसाठी उमेदवाराला ९ लाख रुपयांपर्यंत खर्च करता येईल, तर त्यांतर्गत पंचायत समितीसाठी ही मर्यादा ६ लाख रुपये असेल.
मतदारांसाठी सुविधा आणि 'पिंक' बूथ
मतदान केंद्रावर ज्येष्ठ नागरिक, दिव्यांग आणि तान्ह्या बाळासह असलेल्या महिलांना प्राधान्य दिले जाईल. ज्या ठिकाणी महिला मतदारांची संख्या अधिक आहे, तिथे सर्व निवडणूक कर्मचारी आणि पोलीस महिला असतील, ज्याला 'पिंक मतदान केंद्र' म्हणून ओळखले जाईल. मतदारांना आपले नाव शोधण्यासाठी 'मताधिकार' मोबाईल ॲपची सुविधा उपलब्ध करून देण्यात आली आहे.
प्रचार आणि आचारसंहिता
३ फेब्रुवारी २०२६ रोजी रात्री १० वाजल्यानंतर सभा आणि प्रचारफेऱ्यांवर बंदी येईल, तर ३ फेब्रुवारीच्या मध्यरात्री १२ वाजेपासून जाहिराती प्रसिद्ध करण्यास मनाई असेल. निवडणुकीसाठी सुमारे १ लाख २८ हजार कर्मचारी आणि २५ हजार ४८२ मतदान केंद्रांची व्यवस्था करण्यात आली आहे.
मुंबई (प्रतिनिधी): अमोल जाधव
Post a Comment
0 Comments